Z Města/Cottbus. Pśi wobejźenju (Begehung) su łužyske cłonki Zwězka 90/Zelenych pśi Chóśebuskem Pódzajtšnem jazorje (Liškojskem jazorje) zwěsćili, až jo wódny staw wót kóńca slědnego lěta kradu spadnuł. K tomu pśiźo, až firma LEAG njejo wót maja 2025 wěcej wózjawiła žedne daty wódnego stawa w informaciskem kašćiku pśi pśilewańskem załožku (Einlaufbauwerk) pla Łakomy. Dnja 23. decembra 2024 jo LEAG wuzjawiła, až jo se cilowy wódny staw wót +62,5 mejtarjow NHN dojśpił. Pśi pegelowem kiju w jazorje blisko pśilewańskego załožka pak lažy gódnota aktualnje jano hyšći něźi pśi +62,2 mejtari NHN.

„Wódny staw, kenž jo 30 centimejtarjow nižy, groni glědajucy na wjeliki pówjerch Pódzajtšnego jazora bejnu zgubu wódy,“ rozjasnijo Heide Schinowsky, wokrejsna pśedsedaŕka za Zwězk 90/Zelenych we wokrejsu Sprjewja-Nysa. Ako móžnej pśicynje za to pśiźotej do pšašanja wuparjenje (Verdunstung) dla śopłych temperaturow kaž teke zaśacanje (Versickerung) wódy do dna, kenž njejo hyšći dopołnje naseśone (gesättigt). Zazdaśim njejsu razka te dešćowate tyźenje w juniju te zguby zarownaś mógali.