Z Janšojc/Jänschwalde. Zachadny stwórtk jo był w Serbsko-nimskem domowniskem muzeju Janšojce wjeliki ruš. Su ga wótwórili nowu wustajeńcu z mjenim „Swět powěsćow a Serbow“ z twóŕbami wuměłcowki Marita Wobserowa.

Ta samostatna stwóriśelka póchada z Chóśebuza a njejo w prědnem rěźe póśěgi k serbskej kulturje měła. Rozsudne za jeje pózdźejše wuwiśe jo był měsćański swěźeń w Chóśebuzu, ako su žeńske w swěźeńskich drastwach zajmowanosć pla njeje zbuźili, ako sama tak groni. Ale pšawe zastupjenje do swěta Serbow jo akle pitśku pózdźej namakała. Ako su žeńske ze swójimi drastwami do jeje wobchoda pśišli, aby se dali serbske kóšule rěšyś. Mjazy nimi jo teke był cłonk rejowańskeje kupki Barbuk, kótaryž jo Maritu Wobserowu motiwěrował sobu cyniś, což jo teke pśiwzeła. „Na zachopjeńku som cesto wopak rejowała a zmólki cyniła“, pśiwdajo chachajuca. Weto njejo wóna pśestała a se procowała. Jo samo za krotki cas w Złem Komorje w rejowańskej kupce „Pśěza“ sobu gótowała. Tak jo se do swěta dolnoserbskeje kultury a žywjenja zatkała a pokažo to teke w swójich twóŕbach.