Konstanze Kušcyc, redaktorka Nowego Casnika, jo se rozgranjała z Lorenzom Kraußom, kenž jo nowy regionalny powědaŕ Domowinskeje župy Dolna Łužyca. Kak jo se wón južo zaźěłał, w kótarych wobłukach jo dotychměst statkował a kak stoj k dolnoserbskej rěcy?

 Pśisamem dwa mjaseca jo ten 25-lětny Lorenz Krauße južo w słužbje. Wón jo pśewzeł to městno regionalneje powědaŕki Karin Tšukoweje, kótaraž jo pśed chylu na wuměńk šła.

Lorenz Krauße jo złožył fachowu abituru na Centrumje wušego schójźeńka w Chóśebuzu (OSZ) a jo pótom 2019 zachopił pśi LEAG w janšojskej milinaŕni na mechatronikarja wuknuś. Pó tśi a poł lětach wukubłanja jo wón hyšći dwě dalšnej lěśi we tej firmje źěłał. Wón jo se žycył pówołańsku změnu. Aby mógał pówołanje lěpjej zwězaś ze swójimi cesnoamtskimi statkownosćami, jo wón preferěrował, gaž njejo to wěcej źěło w změnach (Schicht-betrieb).