Z Noweje Niwy/Neu Zauche. Za kupkowe foto pśed nowoniwańskeju cerkwju su nosyli žeńske w swójej swěźeńskej drastwje hyšći obligatoriske elegantne carne niske crjeje, ale w slězynje su južo byli pśigótowane sportowe crjeje. Z tymi su mógali pózdźej na sćernišću nejlěpjej chójźiś, teke sportowe wuběźowanje žeńskich w dalokochytanju gumijowych škórnjow su mógali tak lěpjej zmejstrowaś.

Pó kupkowem fośe jo šło direktnje na Studnine naměsto. Romy Lehmannojc a Leonie Nowigkojc stej wuwitałej gósći a stej skrotka slězynu nałoga rejtowanja wó kołac rozkładowałej a pśecytałej bejnje dłujku lisćinu sponsorow. Ta jo pokazała zwězanosć luźi z błośańskimi nałogami, pó źělach teke wejsne granice pśesegajucu.