Z Miłoraza/Mühlrose. Srjodu, 6. awgutsa, jo se w Miłorazu drje nejwětše lěśojske žycenje wšyknych wobydlarjow tola hyšći zwopšawźiło: nowa plěwaŕnja jo se wótwóriła za kupański wobchad. Šulske prozniny se w Sakskej bóžko ku kóńcoju chylaju, ale lěśe weto hyšći zlubijo kupańske wjasela. A gaž jo wucba mimo a domacne nadawki su gótowe, móžoš se teke kupaś.

Termin wótwórjenja plěwaŕnje su z boka gmejny Slěpo krotkodobnje póstajili. Wina na tom su byli slědne zastojnske napołoženja a dotychměst njespódobne lěśojske wjedro. Wjeliki swěźeński akt njejo dało, ale prědnej „kupańskej nymfje“ Laureen a Leni stej z wjaselim se blumbałej a kaliłej we 21,3 stopnjow śopłej wóźe. Wobej drje se zapišotej ze swójim zmužnym skokom do nowego plěwańskego basena do chroniki Miłoraza. Z Friedhelmom, ak njejo taki zmužny był, stej pśed tym pód pśiklaskom dorosćonych, mjazy nimi Slěpjański šołta Jörg Funda, wótwórjeński bant pśed basenom rozstśigałej.