Wón jo jaden tych nejlěpšych pśikładow za to, až to jo wšojadno, wótkul pśiźoš – twója wutšoba ga móžo taka pšawje serbska wordowaś, hejnak by ty se to serbske z maminym mlokom nasrěbał. Ako jo se Gregor (Grzegorz) Wieczorek 4. awgusta 1975 w Pólskej – we Tychach w Šlazyńskej – naroźił, njejo hyšći było pśedwiźeś, z kakeju bejneju angažowanosću raz buźo za skšuśenje dobreje žyweje dolnoserbskeje rěcy statkowaś. To mjazy drugim ako dłujkolětny šefredaktor Nowego Casnika.