Ze Serbskego domu/Wendisches Haus. Dogromady jo Serbska kulturna informacija Lodka wót lěta 1992 dotychměst wugótowała 129 wšakich wustajeńcow w klubowni Serbskego domu. Za wětšy źěl su mógali w nich serbske a nimske mólarje, grafikarje a dalšne wuměłce z cełeje Łužyce pśedstajiś swóje wobraze, mólby a druge źěła. Lodce pak jo se póraźiło, teke dobyś wuměłcow z drugich krajow za to, aby howko do Chóśebuza pśišli ze swójimi wobrazami a drugimi wuźěłami. Mjazy drugim z Pólskeje a Českeje, a to su byli za wětšy źěl take wósobiny, ako su doma we swójich krajach pśipóznate a znate wuměłce.