Z Dešna/Dissen. Slědny kóńc tyźenja jo se pěty nakład Słowjańskego bajkowego festiwala pśi a w Dešańskem domowniskem muzeju z wušej 400 woglědarjami ako wjelgin wuspěšny wopokazał. Njeglědajucy na wusoke lěśojske temperatury jo wjele źiśi ze swójimi starjejšymi a starymi starjejšymi pódla było. Su se woglědali źiwadłowe graśa, su baslili w muzeju, proběrowali stśělenje ze šypami a pšužynu abo drjewowe graśa w zagroźe slězy wobłuka pód gołym njebjom „Stary lud“. How su wóni pśisłuchali bajkam wó Peterje z łucywowego grodu z wust bajkoweje wulicowaŕki Monika Auer- owa. Sobotu jo se starała rěcna motiwatorka Iben Lotric ze swójim graśim k sobugótowanju „Secret room Krabat“ za pógibowanje w muzeju, a to w serbskej a nimskej rěcy.