Z Dešna/Dissen. Pód titelom „Módre z běłymi kwětkami“ jo se njeźelu wótwóriła nowa wósebna wustajeńca w dešańskem Domowniskem muzeju. How se pokažo wjelika wjelerakosć módrośišća, to tradicionelne a to moderne. Njeglědajucy na měnjate wjedro jo wokoło 40 luźi pśichwatało.

Južo w lěśu 2020 jo dało w dešańskem muzeju pódobnu wósebnu wustajeńcu wó módrośišću, pód samskim titelom. „Módrośišć jo do lěśojskego casa kšasnje pasujuca tema, kenž wjele gósći zajmujo. A smy se myslili, až móžomy to pó pěś lětach hyšći raz gótowaś“, jo groniła Babette Zenkerowa, wjednica muzeja. Ak lěśojskej atmosferje pśi wernisažy su teke něžne saksofonowe zuki wót Lutza Spinda pśinosowali.