Ze Slěpego/Schleife. Miłoraz dej copaś, aby se tam wudobywało až do lěta 2038 110 milionow tunow wugla. Ramikowy plan (Rahmenbetriebsplan) firmy LEAG k temje „Źělne pólo Miłoraz/Mühlrose we wuglowej jamje Wochoza/Nochten“ jo wót 30. junija až do 29. julija zjawnje pśistupny. We tom casu móžośo se jen woglědaś we wobźěleńskem portalu Lichotnego stata Sakska w interneśe. Mimo togo jo wón wupołožony w gmejnje Hamor/Boxberg. Až do 28. awgusta jo móžno, pisne stojnišćo (Stellungnahme) pśi Sakskem wušem górnistwowem amśe Freiberg wótedaś. To zdźělijo gmejna Slěpe we aktualnem amtskem łopjenu.

LEAG planujo na krotkem zajtšu Mułkojc/Mulkwitz wótbagrowanje jsy Miłoraz, něźi 562 hektarow wjeliku pśestrěń. Tamne wobydlarje su až do kóńca 2024 pśesedlili. Slědne wótewześa (Entwidmungen) su pótrjefili plěwaŕnju, tśibocny dwór z kjaglowanišćom a naslědku dom za rěd wognjoweje wobory a kjarchob. Brunica ze źělnego póla Miłoraz dej słužyś z wuglom za zastaranju milinaŕnjowu Hamor, Carna Plumpa a zapołožka k zlěpšenju wugla (Kohle-Veredlungs-Anlage) Carna Plumpa.