Zachopjeńk junija jo redaktorka Jill-F. Ketlicojc se wjaseliła góźbje, interviewowaś něgajšnu rědownisku towarišku, z kótarejuž jo na Dolnoserbskem gymnaziumje (DSG) abituru gótowała. Jo to Lucie Luise Thiede, wót 2014 kšuśe angažowana źiwadłownica na Statnem źiwadle w Chóśebuzu. Naroźiła jo se wóna 1991 w Barlinju. Ako jo tśi lěta była, stej starjejšej z njeju do Chóśebuza śěgnułej, aby tam na Statnem źiwadle źěłałej. Tak jo Lucie w „Měsće“ wótrosła, jo na 20. zakładnej šuli (źinsa Fröbelowa zakładna šula) wót prědneje rědownje serbsku wucbu měła a jo pó 4. lětniku do wugbaśoweje profiloweje rědownje na DSG změniła, źož jo 2010 abituru złožyła. Mjaztym wóna bydli w Lutolu z cłowjekom, synom a pśirodnym synom.