Z Mósta/Heinersbrück. Jo to był cele wósebny jubilej, kenž su Mósćanarje pśedslědny tyźeń, ga 24. maja swěśili. Wužywali su za to areal pódla wognjoweje wobory respektiwnje tam, źož jo se 2019 Superkokot slědny raz pśed korony wugótował. Na swěźeńskej łuce su pśed jawišćom wjele móžnosćow k sejźenju napórali. Wjelike jawišćo su wobwite swajźbaŕske wrota wupyšnili, na kótaremž su wušywane cypjele wisali.

Pśed swětosnosćami

Nježli až swětosnosć jo se zachopiła, jo se wótměło zmakanje rucnikaŕskeje seśi. Pótom jo było móžno, mały mark kołowokoło togo serbskego woglědaś. Wjele nosaŕkow drastwow jo se śišćało wokoło stojnice z Frankena. Tam ga su se póbitowali raz hynakše sukna. Njejsu byli tunje, ale chtož jo kśěł něco wósebnego měś, jo se kradu za to zajmował. Teke Lodka, Ludowe nakładnistwo Domowina abo Kathrin Zubikowa su ze stojnicu pódla byli. Pśi tej slědnej jo dało něco za kněnje a knězow. Bundlišk za zapust z pśepasom, z krawatu a paleńcowym šantkom, wšo pasujuce pó barwje.