Z Lubina/Lübben. Spiwańsku tradiciju w ramiku pśězow wóžywiś jo była mysl, z kótarejež jo pśed 50 lětami w domje „Burglehn“ na něgajšnem słowjańskem groźišću w lubinskem měsćańskem źělu Kamjenna (Steinkirchen) se zroźiła ideja, žeńskecy chor załožyś. To jo se stało 18. měrca 1975. Wót togo casa słušaju domowniske spiwy, ludowe spiwy a pśi tom teke serbski spiwowy pókład do repertoire Błośańskego žeńskecego chora Lubin. Ku góźbje 50-lětnego wobstaśa chora jo se wótměł pětk, 23. maja, wósebny jubilejny koncert we woponowem zalu w Lubinje, a to jo była teke góźba za wjele wutšobnych gratulacijow, za pśepódaśe darow kaž teke za slědkglědanje na stawizny chora.