Ako pśisamem wšuźi se zachopijo lěto za barbucku młoźinu ze zapustom. Pśi tom su z terminom teke wjelgin wót kapałow wótwisne. Tak móžo se teke wušykowaś, až se pó zapustojskem pśeśěgu camprujo. Pó cełej jsy camprowaś, to pak wóni njegótuju sami, ale teke Barbukarje su how pšašane. Zastanu w běgu pśeśěga pla pśedsedarjow towaristwow a cesnych wobydlarjow Barbuka. Pśeglěd wó tom matej wjednika młoźiny Spillerojc Tobias a Lina. Pśi tom ma Tobias Spiller wjednistwo młoźiny južo wót 2016 na starosći, pśed tśimi lětami jo pśišła jogo śeśenica Lina k tomu. Wobej nawjedujotej pśeśěg a rejujotej ze sponsorami, a ako źěk za pósćiwanki k zapustoju se teke pśepódaju rane kwitaki w gjarnyšku. „Sponsory se wjasele kwětkam a je raźi sajźiju do swójeje zagrodki“, groni Lina Spillerojc. Wšyknych pěś lět wóni swěśe jubilejny zapust, gromaźe z wóženjonymi.

Tuchylu jo 35 aktiwnych cłonkow w barbuckej młoźinskej kupce, pśi lětosnem łapanju kokota se pśiwzeju styri nowe cłonki do młoźiny. Pśed tym su wóni južo k jatšownemu wognjoju a stajanju majskego boma pśepšosone, aby južo prědne doglědy dobyli.