Z Barlinja/Berlin. Kubłański forum pśeśiwo anticyganizmoju w Barlinju jo był gósćowaŕ Załožboweje rady, kótaraž jo stwórtk, 22. maja, wobradowała. Wažna tema jo była wótzamknjenje etatowego lěta 2024 – Załožbowa rada jo to wobzamknuła. Źěl njepśetrjebanych personalnych srědkow (360.000 euro) ma se za nuznje trjebne saněrowanje doma Mjertyna Nowaka-Njechorńskego wužywaś. A do zgromadnego systema za management dokumentow, kótarež se rowno za Ludowe nakładnistwo Domowina a zastojnstwo Załožby za serbski lud zarědujo, maju se hyšći lětosa teke Domowina z Rěcnym centrumom Witaj, Serbski institut a Serbski ludowy ansambel integrěrowaś. Za toś tu integraciju jo Załožbowa rada 70.000 euro k dispoziciji stajiła. Teke staw jadnanjow wó Pětem financěrowańskem dogronje mjazy Załožbu za serbski lud, Zwězkom a krajoma Bramborska a Sakska jo stojał na dnjownem pórěźe. Ako su zastupniki pjenjezedawarjow źeń pśed pósejźenim zdźělili, njejo Pěte financěrowańske dogrono, ak ma wót 1. januara 2026 płaśiś, doněnta wujadnane.