Z Bórkow/Burg. „Wukšadnjony pókład abo kak jo kulka do Błotow pśišła“– to jo titel 16. Błośańskeje powěsćoweje nocy. Muzikaliski powěsćowy spektakel pód gołym njebjom tek lětosa zasej woła na Grod (Schlossberg) do Bórkow, wót 7. do 9. junija. Tenraz jo to tšojenje, kenž póchada z pjera chóśebuskeje comic-wuměłcowki Siggiko. Wó co źo? Smy w Bórkowach lěta 1762, se kněžy Sedymlětna wójna. Pawlina, źowka serbskego kjarcmarja, by kśěła raz wiźeś wužowe šćitowe duchy teje kjarcmy abo wužowego krala wósobinski. Za tym až wójaki mysteriozny měch z kanala slězy kjarcmy śěgnu, chopijo se za Pawlinu dyrdakojstwo, kenž jeje cowanja pśetrjefijo. Wóna musy šćitowy duch Mato pśed rozgórjonym wódnym mužom wumóžyś, a to jo wumóžeńska akcija, ako wjeźo do swěta serbskich powěsćowych figurow. Režiju wjeźo Annika Nitsch a wugótowanje powěsćoweje nocy 2025 ma Linda Siegismund na starosći. Pódla znatych serbskich melodijow budu słyšaś teke kompozicije Wolfganga Böhmera. Choreografije póchadaju wót baletoweje mejstaŕki Serbskego ludowego ansambla Mia Facchinelli.