Z Budyšyna/Bautzen. „Landschaft im Wandel – Lausitz“ njejo jano to moto a zrownju nadawk togo wuběźowanja wó „wuměłske myto“, ale teke titel wustajeńce, kótaraž jo se 10. apryla w budyšyńskej głownej wótnožce banki „Volksbank“ wótwóriła. Pśedsedaŕ gósćinaŕskego instituta Remo Teichert jo pówitał gósći. Roland Gräfe wót Załožby Rolanda Gräfego, kótaraž to myto pósćiwa, jo gronił, až wóni su byli nastupajucy kwalitu a wjelerakosć zapódanych twóŕbow kradu zaźiwane. 30 tych dogromady 37 naraźenjow jo wótpowědało wupisanjenju. „Pśi wuběrku smy na to glědali, až se ceła, stakim teke pólska Łužyca, zapśimjejo.“ Pśeto cil załožby jo teke, pśez wuměłstwo a kulturu mósty twariś. Kurator a cłonk jury Hellfried Christoph jo se źěkował Gräfemu za jogo priwatny angažement a jo rozkładł, kak su se twóŕby wugódnośili. Wuslědk – ta wustajeńca – jo wobšyrny pśeglěd aktualnego stawa twórjecego wuměłstwa we Łužycy. Pokažu se twóŕby wót 27 na wupisanju wobźělonych wuměłcow a wuměłcowkow. Nosaŕ naspomnjetego myta jo Chóśebuzaŕ David Lehmann.