Jogo žywjenje jo wuměłstwo. Jörg Tausch (roźony 1967 we Wórjejcach) jo pó wuwucenju a wóterych studijach wugbał wšakorake pówołanja, kótarež jogo wupołniju. Wuwucony štukatěr jo studěrował 1989/90 w Chóśebuzu mólaŕstwo a grafiku, 1989 do 1992 jo slědował w Lipsku mejstaŕski studium, z kótaregož wón jo wujšeł ako mejstaŕ a restawrator w štukowem rucnikaŕstwje. Pón jo pśizamknuł 2000/01 studium na restawratora w Raesfeld. W lětach 2015 do 2018 jo Jörg Tausch teke hyšći wuměłstwowu terapiju studěrował. Take fachowe znaśa jomu zmóžniju wjelebocne pówołańske žywjenje. Ale w prědnem rěźe wón dajo swóju wědu młodšej generaciji dalej, a to ako wucabnik za wuměłstwo na Wušej šuli w Slěpem. Wšykne druge statkownosći a nadawki wón realizěrujo we wólnem casu, pó źěle ako na dowolowych dnjach, kenž „woprujo“. Južo 1990 jo wón za to załožył swójo pśedewześe „Stuck-Hof“.