Z Pódstupima/Potsdam. Srjodu, 26. měrca, ako jo bramborski ministaŕski prezident Dietmar Woidke swójo kněžaŕstwowe wuzjawjenje pśed bramborskim parlamentom źaržał, stej Babette Zenkerowa a Kathrin Šwjelina z Domowniskego muzeja Dešno w krajnem sejmje w Pódstupimje byłej. Na kšomje plenarnego pósejźenja stej wónej wótpósłańcam a pśepšosonym gósćam móžnosć póbitowałej, do fasciněrujucego swěta jatšownych nałogow nejwětšeje mjeńšyny kraja Bramborska se zanuriś.

W srjejźišću su stojali wuměłski wupyšnjone jatšowne jajka, kótarež se pśez tradicionelne techniki ako wóskowanje a škrabanje wugótuju. Wjednica dešańskego muzeja, Babette Zenkerowa, jo demonstrěrowała źěłowe kšace a jo rozkładła wuznam toś tych wuměłskich rucnikaŕstwow. Pśewóźujucy jo se pokazał film wó serbskich jatšownych nałogach we Łužycy, kótaryž jo pódšmarnuł dłymoki zwisk Serbow k jich wěrje a kulturje. Mimo jatšownych jajkow su se teke dalšne nałogi ako jatšowne spiwanje a chójźenje pó jatšownu wódu tematizěrowali.