W maju 1975 som z mójeju žeńskeju wót Slěpego do Brězowki pśeśěgnuł. How smy dostali bydlenje w kšywowem natwaŕku něgajšneje zakładneje šule. Napśeśiwo nama jo była jadna kowalnja, w kótarejž jo se wšednje mócnje źěłało. Kowalskej mejstarja stej byłej Holcojc nan Wilhelm a syn Siegfried. Mjaztym až jo Wilhelm teke tam a sem kónjam nowe kopyta pśiměrił, jo Siegfried wukował płoty, wrota a wše móžne zelezowe źěle, kótarež su luźe pla njogo skazali. Cesto jo se źěłkotało až do ranego wjacora. Ale pětk jo był pśecej dypkownje cas pó źěle. Pón jo Siegfried pśecej pópadnuł swój kofer ze serbskimi dudami a jo do Slěpego dojěł na probu w lěśe 1973 załožonego Serbskego folklornego ansambla Slěpe, aby gromaźe z drugimi gercami grał. K tomu su žeńske chora spiwali a młodostne rejowańskeje kupki rejowali. Až do lěta 1978 jo wón był organizatoriski wjednik ansambla.