Ze Serbskego Domu/Wendisches Haus. Dnja 28. februara bu na głownej zgromaźinje Domowinskeje župy Dolna Łužyca w Žylowje wuzwólone nowe župne pśedsedaŕstwo z dogromady 13 cłonkami. Bóžko pak njejo nichten z nich tam pokazał swóju wólu a zwólniwosć, kandiděrowaś za wažny amt župana abo županki – teke doněntejšny župan dr. Pětš Šurman nic. To jo se dejało na prědnem pósejźenju pśedsedaŕstwa slědny tyźeń stwórtk w Serbskem domje nachwataś. Ako prědny cłonk bu Karin Tšukowa za tu wažnu funkciju naraźona – wóna pak jo to wótpokazała. Ole Schmalfuß ze Žylowa a Noah Rex z Janšojc – tej nejmłodšej cłonka pśedsedaŕstwa – stej pón naraźiłej Michaela Apela, kenž jo rowno tak ako tej dwa nowy cłonk w župnem pśedsedaŕstwje. Ten jo tu kandidaturu pśiwzeł. W pótajmnem (kšajźnem) wuzwólowanju jo wón wót tych 12 pśibytnych cłonkow 11 głosow dostał, jaden jo był pśeśiwo njomu. Ako zastupny župan buźo Marcus Końcaŕ tak ako dotychměst tu wjeliku župu ze pśisamem 2.800 cłonkami w 31 Domowinskich kupkach, 12 młoźinskich Domowinskich kupkach a 23 towaristwach sobu nawjedowaś.