Z Wjerbna/Werben. Na drugem kóńcu tyźenja zapustojskego casa, rozmjej 25. januara, jo se we wjele jsach Dolneje Łužyce zapustowało. Mjazy nimi stej pak byłej jano dwě z wósebnym jubilejom, ga Pśiłuk a Wjerbno. W błośańskej jsy Wjerbno su ga južo swój 185. jubilejny zapust swěśili. A za toś ten wjerašk togo lěta jo se tradiciskemu towaristwoju a młoźinje póraźiło, wósebnje wjele pórikow wabiś: 26 młoźinskich pórikow jo se wobźěliło a pśi tom jo se kužde źowćo lapu stajiło, samo 63 pórikow wót tych starjejšych a wóženjonych jo se rozsuźiło sobu zapustowaś. Wulicowali su, až by wó wjele wěcej wordowało, gaž njeby kursěrowała gripowa žwała. A 30 źiśecych pórikow – jadno źowćo ga ze źiśeceju lapu –, jo dłujki zapustowy pśeśěg wobogaśiło.