Z Gór/Guhrow. Ako naslědnik łoni zemrěteje Erny Koppermannoweje jo nowy šołta Frank Engelking lětosa prědny raz zastojał woklapnicu na Górach, pódla dalšnych zastupnikow gmejnskego zastupnistwa. Wótměła jo se ta woklapnica pětk, 3. januara, w zgromadnem wejsnem domje. Frank Engelking, kenž jo zrownju pśedsedaŕ amtskego wuběrka, jo pśibytnych pówitał a jim pśedstajił moto, pód kótarymž co swój amt ako šołta wugbaś: „Tradicija, zgromadnosć, dalejwuwiśe“. Z tym jo pódšmarnuł, až mjazsobnosć jo jomu wažna. A tak, ako jo nałog pśi woklapnicach, jo šołta dał pśeglěd, co jo se w zachadnem lěśe gibało na Górach. Tak maju wót łońskego stawne blido za pśedewześarjow na Górach, wognjowu woboru pak wěcej we jsy njamaju, ta jo pśišła do susedneje Brjazyny. Wuzwignuł jo Engelking aktiwity k jubileju 555 lět Góry, mimo togo nowe lězadło, ako jo se wobstarało za górjańske grajkanišćo, a wuspěšne saněrowanje sportaŕskego doma, za kótarež něnto teke nowe stoły a blida dajo.