Z Gór/Guhrow. K slědnemu razoju w tom lěśe su młoźinske kupki Domowiny gromadu pśišli. Za to jo młoźinski koordinator, Tobias Unger, jich do sportaŕskego doma na Górach pśepšosył. Wón jo južo k pśedslědnej zgromaźinje gronił: „Sćo južo wumarkowali, rad změnjam městno zmakanja.“ Pó Žylowje a Turnowje su lětosa Góry na rěźe byli. Górjańska młoźina jo se pśed někotarymi lětami nowo załožyła a jo lětosa zasej zabijanje kokota pśewjadła.

Dogromady 19 młoźinskich kupkow z wokrejsowu Sprjewja-Nysa a Dubja-Błota a z města Chóśebuz jo pśepšosenjeju slědowało. Hynac ako na normalnem młoźinskem aktiwje, źož jo zwětšego jano młoźinske wjednistwo pódla, jo mógła kužda młoźina dwa abo tśi cłonki na dokóńcenje lěta sobu pśinjasć. Dla togo jo se teke wěcej ako 60 młodostnych w sportaŕskem domje zgromaźiło.