Z Bobolc a Tśikojc/Boblitz und Peickwitz. Gaž se zmakaju žeńske Tradiciskego towaristwa Bobolce z.t. na trajdowišćach, wěźe te wopóznate (Eingeweihte) južo, co maju prědk. Toś to towaristwo jo wót krajnego zagrodowego rozpokazanja 2000 we Łukowje (Luckau) za to znate, až woplěwa teke z wjele źěłom zwězanu, ale wjelgin wobźiwowanu tradiciju: wiśe žnjowneje krony pó pśedpisanych kriterijach – ta dej byś maksimalnje jaden raz jaden mejtaŕ wjelika byś a styri głowne trajźine družyny wopśimjeś. K tomu słuša teke pódstawk, kótaryž jo za lětosnu bobolsku žnjownu kronu Günter Thiele pśigótował.

Kóńc junija se trajda wótrěžo, wusušyjo a se kóńc awgusta do strusackow wijo. Žeńske tradiciskego towaristwa gromaźe pśepowědaju, kótary wuglěd dej žnjowna krona dostaś. Na což su se dojadnali, to zwopšawdnijotej dwě z nich pśi pódstawku. Wósebny magnet za wócy su na gótowej kronje ze sušonych majsowych łopjenow wubaslone drastwine pupcycki nad šlejfkach.