Nic jano górcoty dla jo se sobotu, zeger dweju, wupłaśiło góźinku w chłodnosći dešańskeje cerkwje pśebywaś, ně, teke zajmny pśednosk dr. Alfreda Roggana wó historiji cerkwje jo jadnab 30 luźi ze swěźeńskego ruša do sakralneje śišyny wabił. Faraŕka Katharina Köhlerowa jo gósći dwójorěcnje wuwitała a pśi tom teke swóju drastwu wopisowała. Dr. Roggan jo na wósebnosći w lěśe 1778 natwarjoneje cerkwje pokazał, kótaraž jo tencas była w zagronitosći stata a z tym we tej Friedricha II., wjelikego. Z tym jo měł stat teke nadawk za wobnowjenje pó „tunjej“, drjewjanej twaŕskej wašni a to jo było nanejpózdźej w lěśe 1934 wjelgin notne: Chóśebuski wušy twaŕski amt ga jo zakazał wužywanje cerkwje brašnosći dla. Na gluku za serbsku wósadu a tencasnego fararja Bogumiła Šwjele, stej dwě lěśe do togo statne wótwardowanje pomnikow (Denkmalpflege) a cerkwinski konsistorium w Barlinju wobzamknułej, až stara serbska cerkwja by se dejała wuchowaś. W drugich dolnołužyskich jsach su cerkwje pó tej starej drjewjanej twaŕskej wašni 18. stolěśa wótryli a cele nowe natwarili.