W lěśe 2022 su wujšli knigły: „Weil ich ein Inuk bin“. Jo to žywjeński běg Jana Awgusta Měrćinka. Wón jo se wót 1850 až do 1854 wobźělił ako pśełožowaŕ za pśirěcy Inuitow na pytanju britiskich namóŕnikow za Franklin-ekspediciju w Arktisu. Pytanje jo było bźez wuspěcha. Což pak su muže wunamakali, jo była pódpołnocno-pódwjacorna pasaža mjazy Atlantikom a Pacifikom. Do swójogo dnjownika pišo Měrćink, až jo gjardy, ako prědny Serb tak daloko na pódpołnocy byś, a to jano z Bóžeju pomocu a pśez to, až jo Inuk. Take zacuśa znaju, dokulaž som był w lěśe 2000 prědny luź z mójeje rodneje jsy, kenž jo stojał na brjogu Pacifika, a to na stronach roda Quinault, źož jo howacej jano Indianarjam pśistup dowólony.