Jadnasćo młoźinskich kupkow jo se wuspěšnje wobźěliło na volleyballowem Cupje Domowiny 2024. Te zajmne graśa su wótběgnuli mimo zranjenjow. 2025 buźo volleyballowy Cup na drugem městnje. K. K. 
Z Turjeja/Tauer. „K sportoju gótowe!“, jo to groniło zachadnu njeźelu w Turjeju k volleyballowemu Cupoju Domowiny 2024. Dogromady dwanasćo młoźinskich kupkow młoźinskego aktiwa jo se za to zarědowanje pśizjawiło. Dokulaž łoni jo młoźina z Turjeja swój titel zašćitowaś mógała, su wóni teke lětosa zasej gósćinarje byli.
Wótwóriła jo lětosny volleyballowy Cup Domowiny rěcna motiwatorka Iben Lotric ze sportowym towaristwom z Turjeja – wóna jo zastupiła młoźinskego koordinatora Tobiasa Ungera. Pśez to jo serbskorěcne pówitanje pitśku wobšyrnjejše było ako łoni. Wót tych dwanasćo pśizjawjonych kupkow jo jadnasćo nastupiło. Młoźina z Brjazyny njejo pśišła. Andreas Dyck wót SV 1920 Turjej z. t. jo rozkładł młodym grajarjam te pšawidła za ten źeń.
