Z Wětošowa/Vetschau. Z wjelikim pśedwjaselim su docakali Witaj-źiśi horta móžnosćow we Wětošowje wósebny koncert njeźelu, 26. maja. Jo pśisamem tradicija, až hort organizěrujo kužde druge lěto koncert gromaźe z kulturnym towaristwom a ze spěchowańskim towaristwom ,,Tyca-Regenbogen“. Tenraz jo była kupka ,,Serbska reja“ pśepšosona. Źiśi su šli w rědnych drastwach, změstymi w nowo wušytych kóšulach, šorcach a z modernymi lapami wót designaŕki Sarah Gwiszcz do Serbsko-nimskeje dwójneje cerkwje. Tam jo južo cakało wjele gósći, mjazy nimi wjele starjejšych a starych starjejšych. K wótwórjenju su wšykne źiśi gromaźe spiwali a rejowali. Pón su šulske źiśi pór basnjow recitěrowali, nježlic jo slědował wósebny źěl koncerta. Malsnje su se pórali źiśi do publikuma a su pśisłuchali muzice Serbskeje reje. Wóstudne zewšym njejo było. Muzikarje su zwězali swój wustup teke z gódańskim graśim k bajkam, pśedstajenim instrumentow a pśecej zasej rytmiskim sobuwugótowanim serbskich spiwow.