Kóńc maja jo se zmakało „twarde jědro“, 12 absolwentow, abiturnego lětnika 1967 Rozšyrjoneje Serbskeje wušeje Šule w Chóśebuzu (RSWŠ) pó źewjeś lětach drugi raz pśi Baltiskem mórju. Tenraz nic w Roztoku ale w Stralsunźe, źož bydlitej dwa něgajšnej. Stralsund jo dostał w lěśe 1234 lubekske měsćańske pšawo (Lübecker Stadtrecht) wót rujańskego wjercha Wiclaw I. Na tom městnje jo była pśed tym rybaŕska wjas Stralow. Słowańske mě „stral“ groni šypa abo błysk. Stralsund jo był pó Lubeku nejwažnjejše město Hanse. Wót kóńca 30-lětneje wójny do 1815 su wobkněžyli Šwedy Pśedpomórsku ze Stralsundom. Pón jo był pšuski. Stralsund ma źinsa 60.000 wobydlarjow. Wót 1997 stej Stralsund a Wismar swětowe kulturne derbstwo (Weltkulturerbe).