Z Janšojc/Jänschwalde. „Janšojske syłojki“ – tak jo pomjenił šołta Helmut Badtke janšojski žeńskecy chor. Wóni su wótwórili wustajeńcu „Janšojce pó mólaŕsku wuzgónjone“/„Jänschwalde malerisch entdeckt“ wót Rosemarie Kargoweje (Karge). Spiwali su nimske a serbske ludowe spiwy, kótarež jo tych wušej 30 gósći za wětšy źěl znało – změstymi su śicho sobu spiwali. Wótpowědnje lětnemu casoju a šykujuce se k wustajanym wobrazam wuměłcowki su žeńske how kaž pyšna łuka lěśojskich kwětkow se pokazali.
„Wót 30 lět jo Rosie Kargowa južo Janšowaŕka a mjaztym prakamizna“, jo zachopiła wjednica muzeja Rosemarie Tšukowa. Za nju jo to była prědna wustajeńca, kótaruž jo wugótowała. Pó chwalecych słowach šołty wó statkowanju Rosemarie Kargoweje w Janšojcach, jo pśewzeła wuměłcowka sama słowo a jo swóju wustajeńcu w muzejowej brožni wótwóriła. Wěcej ako 30 twóŕbow wót njeje jo wiźeś w brožni a w głownem domje – akwarele, wólejowe a pastelowe wobraze.