Rozdźělenje městnow we wokrejsnem sejmje Górne Błota-Łužyca.
© Landeswahlleiter Brandenburg/Amt für Statistik Berlin-Brandenburg
Z Dolneje Łužyce/Niederlausitz. Wó wuslědkach europskich a komunalnych wuzwólowanjow jo se mjaztym wjele diskutěrowało a wšake politikarje a eksperty su wopytali zaźaržanje wuzwólarjow analyzěrowaś. Jadnu – snaź wěcej za zwězkowu a krajnu politiku se góźecu – sebjekritisku analyzu jo Gregor Gysi (Lěwica) w interviewje z powěsćowym sćelakom „Welt“ srjodu, 12. junija, dał: „Wěsćo, źo zmólka jo? My pśecej wó tom pśemyslijomy, co AfD gótujo. My pśerědko wó tom pśemyslijomy, co wšykne demokratiske partaje wopacnje gótuju, pśez kótarež k wuzwólenjeju AfD pśiźo.“
We skóro wšyknych wokrejsach pódzajtšneje Nimskeje jo pśiběrał pśigłos za AfD, partaje kněžaŕstwa, SPD, Zelene a FDP, su pak głose zgubili. Pódobnje wuglědaju wuslědki wuzwólowanja za Europski parlament. Tam jo w cełej Nimskej CDU/CSU 30 % głosow dobyła, AfD na drugem městnje 15,9 %.