Z Města/Cottbus. Wjele gratulantow, spěchowarjow a pśijaśelow ze serbskego a nimskego swěta jo pětk wótpołdnja do Serbskego muzeja pśichwatowało, aby tśim zagronitym žeńskim, Martinje Nowakojc, Christinje Kliemowej a Katharinje Kliemowej, ku 30-lětnemu wobstaśeju jich institucije gratulěrowało. W ramiku dwórowego swěźenja jo nawjedujuca kuratorka muzeja, Martina Nowakojc, pó krotkem serbskem muzikaliskem programje źiśi ze źiśownje „styri lětne case“ Brjazyna/Strjažow jadnab 60 pśepšosonych gósći wuwitała.

Zastupnik chóśebuskego wušego šołty, decernent Thomas Bergner, jo pótom wuzwignuł wósebnosć historije Serbskego muzeja, kenž „by dejał ako źěl našeje měsćańskeje historije w spomnjeśu wobchowany wóstaś.“ Mimo togo jo chwalił, až njejo muzej jano muzealny, ale rownocasnje identitu dawajucy rěcny rum za serbski lud ako teke kompetencny centrum serbskeje kultury w Dolnej Łužycy.