Wobej wóna lubujo, a wobej wóna z połneju wutšobu zwězujo: źěło ze źiśimi w źiśowni a spěchowanje serbskeje rěcy a kultury. Wjele serbskich muzikowych a źiwadłowych programow jo južo ze źiśimi a starjejšymi na jawišćo pśinjasła, to njamóžo wót 2010 w Kósobuzu bydleca Mila Zachariasowa, ako jo wót 2021 wjednica Witaj-źiśownje Wila Kunterbunt, wěcej licyś. Licyś pak mógu se te lěta jeje słužby kaž teke jeje žywjenja, a tak smějo wóna we tych dnjach ned dwa jubileja wóswěśiś: Až wóna źěła južo 25 lět pla samskego nosarja – ga pla Serbskego šulskego towaristwa (SŠT) –, a až zešwyrnjo 50. lěto. K wobyma jubilejoma jej wutšobnje gratulěrujomy! Jill-F. Ketlicojc jo se z jubilaŕku rozgranjała.

Wy sćo roźona Nagoric, źowka serbskego ceptarja a awtora Gerat Nagora (1936–2010). Sćo Wy doma serbski powědali?