W juniju togo lěta se wuzwóliju tež w Dolnej Łužycy nowe parlamenty we wokrejsach, městach a gmejnach. Pśez to něnto wšake komunalne gremije kšac pó kšacu zakóńcyju swójo źěło a śěgnu bilancu, co su naźěłali.
To jo teke cynił Wuběrk za serbske nastupnosći we wokrejsu Sprjewja-Nysa. Ten jo se zmakał 6. měrca k swójomu slědnemu pósejźenju w něntejšnej legislaturnej perioźe w Domowniskem muzeju w Dešnje. Pśi tej góźbje su teke slědk glědali na 25-lětne wobstaśe togo serbskego wuběrka. Ten jo dobry pśikład za wšykne nimsko-serbske wokrejse w cełej Łužycy.