Z Chrósćic/Crostwitz. Druga Serbska debata dnja 13. měrca we wěcejzaměrowej hali „Jednota“ w Chrósćicach jo na kóńcu gromadu wjadła wšakorake tam pśedstajone pozicije: Serby muse wěcej zagronitosći za swójske šulstwo pśewześ. Gromadne zarědowanje Krajneje centrale za politiske kubłanje Sakskeje, redakcije Serbskich Nowin a Załožby za serbski lud jo moderěrowała redaktorka Serbskich Nowin Milenka Rječcyna. Temu „Serbska kubłańska awtonomija – abo dalej ako pśed tym?“ jo wóna na podiumje diskutěrowała z Dianu Šołćineju, ako nawjedujo Serbsku wušu šulu „Michał Hórnik“ we Worklecach (Räckelwitz), Madlenku Šołćic, ako jo swóje źiśi źaseś lět z Budyšyna do zakładneje šule w Chrósćicach dowjadła, dr. Měrćinom Krawcom, ako jo cłonk Serbskego sejma a cłonk kubłańskego wuběrka togo gremiuma, a z Janom Rjedu, ako jo zastupny pśedsedaŕ Serbskego šulskego towaristwa (SŠT) a wucabnik na Ralbicańskej serbskej wušej šuli.