Ze Žylowa/Sielow. Samo 56 pórikow jo se wobźěliło na młoźinskem zapusće w Žylowje. 25 nowych cłonkow młoźinskeje kupki Žylow jo sobu gótowało, což jo wjele luźi pśechwatało. Njeźelu, 24. februara jo pśeśěg w dwójnem rěźe pó jsy śěgnuł. Zachopiło jo se zeger jadnogo pó „stśělanju“ kupkowego fota pśed znatym sańkowanišćom w Žylowje, źož su pózdźej we wjelikem swěźeńskim stanje reje pśewjadli.

Nejžpjerwjej su jubilejnych wobźělnikow z reju cesćili. Grała jo górnoserbska kapała. Wumaršěrowali su póriki zeger 13:30 do sportaŕskego doma, źož běšo se zapustowy jubilej w slědnem lěśe wótměł. Wjedro jo było ako kazane a togodla su wšykne byli dobreje mysli. Se wě, njejo směła Annamarja-polka felowaś na droze k wšakim stacijam. Pla pomnika padnjonych su wšykne śichu minutu źaržali. Nejdlejše pśestawki su pla stacijow sponsorow, kaž Heinzojc šlodaŕnje, Glodnyojc, Krautzigojc a Sellengojc, byli. Tam su młodostnych ze swajźboweju zupu a kulkami z twarogom wuwitali. Dalej jo pón šło do grichiskego gósćeńca a k drugim pódpěrowarjam zapusta.