Z Gór/Guhrow. Južo dwa tyźenja pśed wjelikim zapustowym pśeśěgom su Górjanarje we swójej domowniskej jsy camprowali. Za to su dostali jaja, tuk a pjenjeze w bogatej licbje. Pilne Górjanaŕki su zezběrali jaja a tuk wót camprowarjow a su jajkowu jězu pśigótowali. We wejsnem domje su se skóńcnje k wjacoroju wšykne zgromaźili.
Sobotu, 24. februara jo był pón toś ten wjeliki źeń. 71 pórikow jo se zmakało – 20 młoźinskich, 45 wóženjonych a šesć źiśecych pórikow. „Wjelikeje licby młoźinskich wobźělnikow dla, by mógali w pśiducych lětach zasej jano młoźinski zapust pśewjasć“, jo groniła Marie-Lusie Nippojc.
We swěźeńskem stanje na najsy su se pśed wumaršěrowanim zmakali. Lysann Pehlojc jo nimske nagrono źaržała, Amy Krausojc a Maria Massalskojc stej ten serbski part pśewzełej. Swój wósobinski jubilej stej Isabel Rattei a Sarah Matuška swěśiłej: Wónej stej se wót zachopjeńka w młoźinskem casu až do źinsajšnego bźez wuwześa na zapusće 20 a 21 lět wobźěliłej.