Z Města/Cottbus. Gaž chóśebuski wušy šołta Tobias Schick a druge głowne pśistajone a politikarje w měsćańskem zastojnstwje na posejźenju měsćańskego parlamenta powědaju wó swójom měsće, pón njewužywaju jano to nimske słowo „Cottbus“, ale za wětšy źěl teke to serbske mě „Chóśebuz“. Take dwójne nimsko-serbske pomjenjowanje ga jo teke oficialne mě głownego města Dolneje Łužyce. Až to pak njejo dawno wšykno, což se cyni zboka Města za serbske žywjenje, za serbsku rěc a kulturu, to jo se pokazało slědny tyźeń srjodu na posejźenju Měsćańskeje zgromaźiny, měsćańskego parlamenta. Tam ga jo Anna Kosacojc-Kozelowa, zagronita (Beauftragte) za serbske nastupnosći w měsće Chóśebuz tak ako kužde lěto rozpšawiła wó swójom źěle wót kóńca lěta 2022 do zachopjeńka něntejšnego lěta. Tenraz pak jo to było tšochu hynakše. Gromaźe z njeju su teke zagronite za młoźinu, za rownostajenje (Gleichstellung), za seniorow a za luźi z duchnymi a śělnymi brachami informěrowali wó swójom źěle.