Z Hochoze/Drachhausen. Wjele tyźenjow pśedplanowanja jo pśejšło do togo tšojenja w Hochozy. 190. młoźinski zapust su njeźelu, 18. februara, swěśili. Pětk jo se młoźina w młoźinskej śpě k finalnej małej młoźinskej zgromaźinje zmakała, su slědne dogronjenja trjefili. Su dali hyšći raz pśeglěd wó wšakich cerach sobotu, njeźelu a pónjeźele ako teke wó tom, chto z kótarymi sponsorami rejujo. Sobotu jo hochoska młoźina prědne wejsne źěle wótcamprowała a wjacor jo była reja w gósćeńcu „K złotemu plonoju.“

Jo to była krotka noc za młoźinsku šefowku Iben Lotric, zajtša jo sejźeła zeger pěśich južo pla frizera. Pótom jo se zachopił mały woblekański marathon za nju a jeje śotu. Stej dejałej jadnasćo žeńskich až do wumaršěrowanja woblac. Což stej wobej teke scasom zwónoźełej.