Z Města/Cottbus. Wałtoru, 20. februara, su se zmakali Witaj-horty (Žylow, Wětošow, Bórkowy, Brjazyna) na wósebne dalejkubłanje. Howacej se zmakaju hortnaŕki a hortnarje pód nawjedowanim dr. Madleny Norberg styri raze wob lěto na didaktisko-pedagogiske a rěcne dalejkubłanje w Rěcnem centrumje WITAJ, ale ten raz jo było planowane něco drugego zajmnego. Dalejkubłanje jo se zachopiło z wjeźenim pśez stawnu wustajeńcu muzeja, ako jo w serbskej a nimskej rěcy teke pśewzeła M. Norberg. Južo tam su hortnaŕki a hortnarje se rozgranjali wó wšakich temach, ako by se teke góźeli za źiśi, na pśikład nałogi, drastwa, rěc, muzika, wudrogowanje abo industrializacija. Pó wjeźenju jo nowa muzeumowa pedagogowka Serbskego muzeja, Katharina Kliemowa, pśedstajiła didaktiski model za woglěd źiśi w muzeju. Hortnaŕki a hortnarje su něnto dejali do togo modela swóje naraźenja a ideje za temy zapisaś. A to su nejpjerwjej diskutěrowali w małych kupkach a pótom z pomocu barwojtych cedlikow a drugich nalipkow w modelu markěrowali.