Z Města/Cottbus. Zachadnu srjodu jo se zakóńcyła wósebna wustajeńca „Darjona wěda“ k cesći Bogumiła Šwjele w Serbskem muzeju. Za finisažu jo se team muzeja góźecy termin wuzwólił: 21. februar jo mjazynarodny źeń mamineje rěcy, kótaryž jo swětowa organizacija UNESCO w lěśe 2000 wuwołała, aby wósebnje wjelgin wobgrozone rěcy do fokusa spórała a je ako znamje kulturelneje identity spěchowała. Naša dolnoserbšćina słuša k tym wobgrozonym rěcam na swěśe – to jo južo Bogumił Šwjela we swójom casu spóznał a z cełeju mócu za nju se zasajźił. Šwjela, jogo pismojstwo a tema mamina rěc su we srjejźišću programa finisaže stojali, kótaryž stej kuratorka muzeja Christina Kliemowa a něgajšna redaktorka serbskego radija Martina Golašojc moderěrowałej. Ako gósći stej pśepšosonej byłej wjednik rěcnego projekta Zorja Maksimilian Hasacki a wuběrny znajaŕ serbskeje rěcy Erwin Hanuš, muzikaliski pśewóźowała jo toś to wótpołdnjo kupka „Słowjańske barwy“.