Z Chóśebuza/Cottbus. Jadnab 150 zajmowanych luźi jo zachadnu srjodu do kafeterije Dolnoserbskego gymnaziuma pśichwatało, aby woglědało wjelike pśedstajenje ptaškoweje swajźby Witaj-źiśownje „Wila Kunterbunt“. Mimo starjejšych a drugich pśiswójźbnych jo kus z titlom „Lapa – die Haube... das „i“-Tüpfelchen der Hochzeitstracht“ wósebnje zajm zastupnikow ze serbskich institucijow wubuźił. Skóńcnje wuknjo wótkubłaŕka Yvonne Skolzenowa tuchylu serbsku rěc w ramiku projekta Zorja: „Pśi procowanju som dejała projekt pśedstajiś, a mě jo ned jasne było, až to buźo ptaškowa swajźba.“ Pomogała toś taki wjeliki kus na nogi stajiś jo jej wjednica „Wile Kunterbunt“ Mila Zachariasowa, kótaraž jo w zachadnosći južo wšake źiśece kuse insceněrowała. „Mila a ja, smej južo dlejšy cas planowałej ptaškowu swajźbu w pitśku wětšem ramiku pśewjasć.“, jo groniła Zorjacka. Ned na zachopjeńku stej wónej w nimsko-serbskem dialogu nastaśe kusa rozkładłej a pódšmarnułej, „źiśi su źiśi“. A wóni su se wumyslili, což se stanjo w kusu a kótaru rolu wóni graju.