Z Dešna/Dissen. Jo śěžko wěriś, až mjaztym jo połojca cas pśi rěcnem projekśe Zorja mimo. Akle w septembrje 2023 jo se projekt w Dešnje na styribocnem dwórje zachopił. Źaseś mjasecow wuknu wobźělniki intensiwnje dolnoserbsku rěc we swójom rěcnem rumje.

Kuždy wobźělnik ma swójogo kmótša, kótaryž swójogo woplěwańca zwenka rěcnego gnězda pódpěrujo. Kmótšy indiwiduelnje se staraju wó swójich kmótśikow, pśewzeju wšake aktiwity, ako na pśikład woglěd w tejowni Oblomow abo w Serbskem muzeju a wobźělenje na serbskem bliźe. W prědnej połojcy Zorjow su wobźělniki swóje wósobinske projekty pśedstajili, z kótarymiž su se procowali. Prědny wuslědk jo pśed krotkim južo wiźeś był: Yvonne Skolzenowa jo wótkubłaŕka w źiśowni „Wila Kunterbunt“ a jo wuwijała źiwadłowy kus ze źiśimi k ptaškowej swajźbje.