Južo pór lět zestajijo a wudajo europska mjeńšynowa organizacija FUEN „Mjeńšynowy kalendaŕ“ k wšakim temam. Lětosa grajo kulinariski swět głownu rolu w kalenderje połny receptow a lubosnymi ilustracijami. Skóńcnje póstajijo teke naša kuchnja, naše tradicionelne jěze a wašnja zežywjenja našu kulturelnu identitu. Z takim pśepšosuju gótowarje kalendarja na kulinariske drogowanje pó Europje. Kuždy mjasec pśedstajijo se mjeńšyna z wósebneju a typiskeju jězu. Za hobbyjowych kucharjow jo recept napisany, aby mógali ned wariś na pśikład klasikaŕ baltisko-nimskeje kuchnje, z měsom połnjone mlince z Litawskeje abo rumuńsku wariantu „plăcintă“, to su mlince z kałom, twarožkom abo z kulkami z Hungorskeje. Teke recepty słodkich pójězow kaž pólski carnicowy mazańc (Kołacz z borówkami) abo „halva“, orientaliski dessert wót Aromunow w Serbiskej, móžośo z pomocu receptow wopytaś. Mimo togo dajo kalendaŕ krotki pśeglěd wó mjeńšynach a rozkładujo slězynu wósebnych jězow.