Z Města/Cottbus. W Chóśebuzu bydli tuchylu pó nejnowšem tšochu wěcej ako 100.000 luźi. Kuždy źasety z nich chójźi hyšći do šule, w šulskem lěśe 2023/24 jo jich wokoło 10.500. Wóni chójźe do 13 zakładnych šulow, do 3 wušych abo cełkownych šulow a do 5 měsćańskich gymnazijow, ku kótarymž słuša teke naš Dolnoserbski gymnazium. A to njejsu jano šule, za kótarež jo město zagronite, ale teke žedne priwatne, ako na pśikład ewangelska zakładna šula a ewangelski gymnazium. Wokoło 1.000 ceptaŕkow a ceptarjow źěła w šulach, a to na 30 wšakich městnach.

W zakładnych šulach wuknjo narowno (durchschnittlich) 23 źiśi w jadnej rědowni (to se śěgnjo wót 15 do 28), we wušych šulach jo jich to južo 25 (20-28) a na gymnaziumach 27 (20-28).

Tak daloko nejwažnjejše licby k šulstwoju w Měsće. Až pak za tym a we nich štyce teke młoge problemy, śěžkosći a njedostatki, to jo se pokazało na januarskem pósejźenju měsćańskego parlamenta. Frakcija CDU ga jo tam wugótowała „Aktualnu góźinu“ k tej wažnej temje. Wšake eksperty – z měsćańskego zastojnstwa, ze šulskego amta a teke wót kriminalneje policije – su k tomu powědali.