Bórkowy/Burg
Wuchackowa a myškowa kupka stej gromaźe swěśiłej
W źiśowni „Spreewald Lutki“ w Bórkowach stej 25. januara wobej Witaj-kupce swěśiłej ptaškowu swajźbu. Južo tyźenje pśed tym su se źiśi a wótkubłaŕki na toś ten źeń pśigótowali. Wóni su ptaški futrowali, su mały źiwadłowy kus nazwucowali a źiśi su zgónili slězynu togo nałoga. Wóni su baslili ptaškowe kostimy a małe ptaški za wupyšnjenje swójogo ruma. Zwucowali su teke spiw „My smy małe ptaški“, kótaryž su na dnju ptaškoweje swajźby gromaźe spiwali.
Ako stej wuchackowa a myškowa kupka swajźbu wóswěśiłej, su hyšći dostali lěbgodne a fryšne sroki wót pjakarja. Aby se hyšći dłujki cas dopomnjeli na ptaškowu swajźbu, su baslili ptaški z kulowatego styropora, kótarež su źiśi směli domoj wześ.
Brjazyna/Briesen