Slědnej kóńca tyźenja jo se wjele gibało we jsach – zyma jo se wugnała. Su camprowali a su byli zapustowe pśeśěgi ze swěźeńskimi drastwami a woblakami. Na tych wobrazach wiźiśo zapustowe impresije ze jsow Popojce, Prjawoz, Rubyn, Strobice a Bórkowy. Na wšaki part su swěśili, pak jo to był zapust młoźiny kaž w Prjawozu a Bórkowach, pak zapust cełeje jsy kaž w Popojcach, Rubynje a Strobicach. Na pśiducych šesć kóńcach tyźenjow jo dosć casa wušej, se hyšći jaden abo drugi zapust woglědaś. Fota: P. Becker/M. Helbig/K. Kušcyc
Wjelim jo to, móžoš groniś, nejrědnjejšy cas w lěśe. We jsach Dolneje Łužyce se wugnawa zyma, a to se swěśi ze zapustom. Cas tych zapustow, tak se zda, buźo kužde lěto pitśku dlejšy. Tak se zachopiju prědne zapusty kóńc januara a te slědne se śěgnu až do srjejźi měrca. Cesto ma to něco z tym cyniś, kak stoje kapały k dispoziciji abo až jadna wjas co se wobijaś prěkowanja ze susedneju jsu. Abo: To su jadnorje kšute terminy we jsach.
Bórkowy/Burg
 |
|
 |
|
