Z Města/Cottbus. W klubowni Serbskego doma wiźiśo tuchylu mjazy drugim „Plonowe woblico“, „Bom źiwow“, „Mań luźi“ abo „Post we flašy“. To ga su titele wobrazow młodego awtistiskego wuměłca Johannesa Hustädta. Wustajeńca pód titelom „rownowen do mólowanja“ z dogromady 20 jogo twóŕbami jo se stwórtk wjacor wótwóriła. 60 woglědarjow jo pśišło a njemało chwalby jo se młodemu wuměłcoju wobraźiło. Sandra Mehlowa wót Serbskeje kulturneje informacije LODKA jo gósći w serbskej a nimskej rěcy pówitała a wósebny źěk jo wugroniła teke Ingrid Hustetowej, maśeri wuměłca, za jeje pomoc pśi pśigótowanju teje wustajeńce. Pó 2012 jo to něnto drugi raz, až Johannes Hustädt w Serbskem domje wustaja. Wjele luźi, kótarež jo tencas na finisažu pśišło, jo se teke něnto zasej pśinamakało, což pokazujo trajucy, wobstawny zajm. Jogo wobraze pśinjasu žywu, wochłoźecu barwojtosć do klubownje, za wětšy źěl su abstraktne, młoge (kaž „Nalěśe“ abo „Gólna krajina nazymu“) teke pśedmjatne. Pśedewšym z pastelowymi pisakami twóri awtist Johannes Hustädt.