Z Města/Chóśebuz. Gaž jo lěto hyšći młode, gaž swěśe źiśi pó cełej Łužycy ptaškowu swajźbu, a gaž su w Dolnej Łužycy zapustowe póriki a camprowarje pó jsach ducy, pón jo teke cas tych ptaškoswajźbnych programow Serbskego ludowego ansambla (SLA). Dwójc raz su pokazali wuměłce z Budyšyna sobotu na Komornem jawišću Statnego źiwadła w Chóśebuzu program pód titelom „Mjazy swětoma“. Jo to muzikaliske graśe wó lubosći, wědomnosći a tšachotach moderneje technologije. Informatikaŕ Wito Bejmak jo napisał libretto a režiju ma Marian Bulank. We srjejźišću tšojenja stoj Pawl (w jogo roli Ignac Wjesela). Wón źěła w medicinskem slěźenju, ale jomu felujo rozsuźeca škricka, aby wuspěšny był. Wón jo zalubowany, jogo wuzwólona pak lubujo drugego. Co jomu wušej wóstanjo, ako do drugeje wopšawdnosći wuběgnuś – do metawersuma? Tam se zmakajo z Lucy, kótaruž pśewóźijo Sonja, Pawlowa pśijaśelka z młodych lět.